மோசடி பேர்வழிகள் கைது என்று இன்றைக்கு பேப்பரில் செய்தி வந்தாலும் நாளைக்கு வேறு யாராவது மோசடிகளை நம்பி ஏமாறும் ரொம்ப நல்லவர்கள் தானே நம் மக்கள். இன்னும் எப்படியெல்லாம் மோசடி செய்வார்கள் என்பதற்கான திகில் டிரைலர் இது.
கொய்யால மூணு மாசத்துல நீங்க கோடீஸ்வரன் சார்
இது கலிபோர்னியா கொய்யா சார் வீட்டில் நட்டு வச்ச மூணு மாசத்துல 30,000 கொய்யாக் காய்க்கும். அதை நாங்களே கொள்முதல் செஞ்சு கோவா மார்க்கெட்டில் விற்போம். வாரம் ஒரு முறை வந்து கொய்யா மரத்துக்கு ஊசி போடுவோம்; பவுடர் அடிப்போம்; போட்டு வைப்போம்.
மூன்று மாதங்களுக்கு ஒரு முறை கொள்முதல் செய்யும் போது ஒரு கொய்யாக்காவுக்கு பத்தாயிரம் வீதம் நீங்கள் பெற்றுக்கொள்ளலாம். இதன் விதைகள் கலிபோர்னியா காட்டுப் பகுதிகளில் இருந்து கொண்டு வர வேண்டி இருப்பதால் ஒரு விதை ஜஸ்ட் 3 லட்சம் ரூபாய்தான்.
எரிபொருள்களில் முதலீடு எகத்தாளமான வாழ்வு
எங்களிடம் 10 லட்ச ரூபாய் கொடுத்தால் போதும் மூன்று தலைமுறைக்கு பெட்ரோல் டீசல் விலை ஏற்றம் பற்றி நீங்கள் கவலைப்பட வேண்டாம். நீங்கள் பணம் செலுத்திய பத்தாவது ஆண்டு முதல் தினமும் 20 லிட்டர் வீதம் 300 வருடங்களுக்கு தொடர்ந்து பெட்ரோல் டீசல் வழங்குவோம்.
நூறாவது ஆண்டு முடிவில் உங்கள் 10 லட்ச ரூபாயை 20 சதவீத வட்டியுடன் திரும்ப பெற்றுக்கொள்ளலாம்.
கல்லூரி மாணவருக்கு கூடுதலாக ஒரு லிட்டர் வழங்கப்படும். பணம் செலுத்திய பத்தாவது வருடமும் அவர் மாணவராக இருக்க வேண்டும்.
செவ்வாய்க்குப் போகலாம்
இன்னும் சில மாதங்களில் தமிழக கல்வி அமைச்சகம் செவ்வாயில் சில பள்ளிக்கூடங்கள் கட்ட உள்ளது. தினமும் பூமியில் இருந்து செவ்வாய்க்குப் போகலாம். செவ்வாயில் ஆசிரியர் பணிக்கு 300 பேர் எடுக்கப் போறதா பேச்சு.
மாதா மாதம் 3 லட்சம் ரூபாய் சம்பளம். டீச்சர் வேலைக்கு சேர 5 லட்சம் குடுங்க. செவ்வாயின் முதல் பள்ளிக்கூடத்தில் முதல் டீச்சர் நீங்கள்தான்.
கரன்சியாகும் கங்காரு
ஆஸ்திரேலியாவிலிருந்து வந்த ஈமு கோழி ப்ளாப்பானதைத் தொடர்ந்து அடுத்த ஆப்பரேஷன் கங்காரு வளர்ப்பு திட்டம். இதை நீங்கள் உங்கள் வீட்டு மொட்டை மாடியிலோ பக்கத்து வீட்டு மொட்டை மாடியிலோ வளர்க்கலாம்.
கங்காரு தன் குட்டியை தானே பாதுகாப்பாக வைத்துக் கொள்வதால், உங்களுக்கு வேலை மிச்சம், இதற்காக 2 லட்சம் முதலீடு செய்தால் அது ரெண்டு குட்டி போடும் போது உங்கள் முதலீட்டும் ரெண்டு குட்டி போடும்.